الاثنين، 8 أبريل 2019

جوزي مش بس بيحب مرات أخويا لأ ده في بينهم مصيبة الجزء الثاني

وياريت الحكاية وقفت بس علي النظرات والتسبيلات لأ دي بقت بتتعمد تقعد جنبه

وكل كلامها يكون موجه ليه واللي يفرس

أن الكلام بيكون بطريقة كلها دلع ولو حد تاني رد تتجاهله

شوية شوية وبقي في وشوشة بينهم تسيبنا قاعدين وتروح تقعد جنبه والوشوشة تشتغل

،أختي حتي أخدت بالها وقالتلي :

ايه اللي بيحصل ده ؟ خدي بالك !

حاولت أني أبطل أروح عند أهلي علشان أبعدهم عن بعض

بالذات أني عارفة أن جوزي عينه زايغة وما بيصدق

ولما كنت بقول لجوزي أني مش هروح كان بيتضايق .

ويسألني : ليه ؟

كنت بتحجج بأي حاجة بذاكر للبنات ،بروق ،تعبانه .....

وكنت بروح أشوف أهلي في نص الأسبوع .

وفضلت علي الوضع ده 4 شهور .

بس بعد كده لاحظت حاجة غريبة أخويا ده شغال سواق في شركة

فساعات بيروح مأموريات تبع شغله وأحيانا المأموريات دي بتكون في محافطات

تانية فبيضطر يبات برة ،ومرة ورا مرة جوزي علي غير عوايده

بقي يتأخر برة وأغلب تأخيره ده بيكون في الليالي اللي أخويا

بيبقي بايت فيها في شغله .

بصراحة بدأت أشك فيه وفي ليلة وهو نايم أخدت تيليفونه أدور فيه

علشان أشوفهم بيتصلوا ببعض ولا لأ

لاقيته عامل رقم سري للتيليفون ودي أول مرة يعمل فيها رقم سري

لتليفونه ،قلت يمكن علشان قفشته قبل كده أكتر من مرة بيكلم بنات .

واستنيت تاني يوم وقلتله هات تيليفونك أرن علي ماما علشان مش معايا رصيد

فتح لي التيليفون ،خدته وعملت أني بكلم والدتي ودخلت المطبخ علشان الأكل

علي النار طلبت رقمها ولاقيته مسجله باسم (ابراهيم شركة)

وفتحت رسالتين بسرعة كده بينه وبين رقمها بتقوله محمود (جوزها)

عنده مأمورية بكرة ،واحدة تانية بتقوله وحشتني!!!!!!!!

من سكات مسحت الرنه اللي رنتها عليها ورنيت علي والدتي

قولتلها : عامله ايه ؟

قالتلي : مال صوتك ؟

قولتلها : مافيش بس داخل عليا برد المهم أنت كويسة قالتلي : الحمد لله .

قفلت مع والدتي ورجعت له التيليفون .

وبعد ما خرج رنيت علي أخويا وأنا منهارة وبعيط ،قولتله كل حاجة

طبعا ما كانش مصدق في الأول بس

قالي : أوعي تبيني لجوزك أنك عرفتي أي حاجة !

وأنا هتصرف قلتله : هتعمل ايه ؟

قالي : هفهمك بعدين ....

وبالرغم من أن أخويا قالي مابينتش لجوزي أي حاجة بس ماقدرتش

وكنت بحاول اتجنبه علي غيرعوايدي بس هو حتي من كتر ما كان دماغه مشغول بيها

ما أخدش باله !!!

وبعد يومين لاقيت أخويا بيتصل عليا

قالي : أنا قولت لمراتي أني عندي مأمورية بعد بكرة وهبات برة .

و......................

يتبع ................

جوزي مش بس بيحب مرات أخويا لأ ده في بينهم مصيبة ..... الجزء الثالث .

جوزي مش بس بيحب مرات أخويا لأ ده في بينهم مصيبة الجزء الأول

أنا متجوزة من 6 سنين عندي 3 بنات ليا أخين وأخت واحدة

اتنين من اخواتي متجوزين قبلي وواحد اتجوز بعد جوازي

ب 3 سنين ،خد مراته(اسمها عايدة) وسكن في شقة إيجار ،معاه دلوقتي ولدين .

دايما كنا بنتجمع أنا واخواتي في بيت والدي يوم في الأسبوع ،جوزي ما

كانش بيرضي يقضي اليوم ده معانا (هو مابيحبش الإختلاط بأهلي كتير)

،كان بيقولي روحي وأنا هبقي أعدي عليكي أخدك

،كنت بتحايل عليه ييجي حتي يتغدي معانا وياخدنا ونروح ماكانش بيرضي

،كنت بروح لوحدي وأخر اليوم ييجي ياخدني .

وبحكم تجمعنا يوم في الأسبوع بدأت أتعرف عن قرب من مرات أخويا

عايدة ،هي تبان في الأول طيبة وغلبانة علشان كده كنت

بستغرب من مرات أخويا الكبير لأنها كانت مابتحبهاش وبتغير

علي جوزها منها ،قلت تلاقيها غيرة سلايف مش أكتر.

بس بعد شويه عرفت أن الطيبة والغلب دول

نعومة ولئم ،وده عرفته لما عايدة بدأت تيجي لي البيت تقعد معايا

وأوقات كتير بتصادف أن جوزي يكون في البيت فكان بيقعد معانا

ويضحكوا ويهزروا وساعات كنت بسيبهم قاعدين مع بعض

وأدخل أجهز الأكل ماهي مش غريبه

وكانت ساعات تشتكي له (جوزي كان بيحكي لي لأنها كانت بتصعب عليهّ!!!)لحد هنا عادي

اللي مش عادي بقي أن جوزي بدأ مرة واحدة يحب يروح معايا عند أهلي

اليوم اللي بنتجمع فيه كلنا بدأ ييجي يتغدي معانا ،شوية وبقي يقعد معانا اليوم كله

بقيت مستغربة ده أنا كنت بتحايل عليه وماكانش بيرضي أبدا

وابتدا يبقي في نظرات وتسبيلات بينه وبين عايدة لما كنت بشوفها كان قلبي بيوجعني

بس ما كنتش بقدر أتكلم لاني لو اتكلمت هيقولوا عليا أني بغير منها .

وياريت الأمر وقف لحد كده لأ.............

يتبع ................

جوزي مش بس بيحب مرات أخويا لأ ده في بينهم مصيبة الجزء الثاني .

حكايتي مع الدجال الجزء الثالث

ولأول مرة الشيخ يطلب أني أدخله لوحدي

وقالي : أظن أنت عارفة أنا عاوز منك ايه المرة اللي جاية تيجي لوحدك !

قلتله : تقصد ايه ؟

قالي : يعني هكون عاوز منك ايه ؟ ده مش طلبي دي أوامر الأسياد

،قدامك لحد الأسبوع اللي جاي ،لو مانفذتيش اللي عاوزه منك هتعيشي أسود

أيام حياتك هتتمني الموت ومش هتطوليه وماحدش هيقدر يخلصك مني

، أنت لسه ما تعرفيش أنا أقدر أعمل ايه .

قمت وأنا بترعش ومن غير ولا كلمة سبتله الأوضة

،خرجت لأختي قالتلي : مالك ؟ وشك مخطوف كده ليه ؟

قلتلها : مافيش يلا بينا من هنا .

خرجنا من عند الشيخ منصوروأنا مقررة أني عمري

ما أرجع تاني ولو علي رقبتي وطول الطريق أختي عمالة تسألني مالك

،طيب الشيخ قالك ايه ؟ يكونش قالك مين اللي عاملك العمل ؟ ايه مالك مسهمة كده ليه ؟

(كنت مخضوضة من الكلام اللي سمعته )

قلتلها : مافيش .

روحت البيت ،لما جوزي رجع سألني عملتي إيه ؟

قلتله : الشيخ ده أنا مش هروح له تاني .

قالي : ليه ؟ ده أنت كنتي بتقولي أنك بدأتي تستريحي علي علاجه !

قلتله : عمال يسحب فلوس عمال علي بطال ودلوقتي حاسة أني رجعت زي الأول .

قالي : لو علي الفلوس ما تشيليش هم المهم أنت تبقي كويسة .

قولتله : لأ خلاص مالوش لزوم أروح تاني ؟

قالي : اللي انت عاوزاه .

وعدي أسبوع (المهلة اللي ادهالي الشيخ) وبدأت أحس أن زي ما يكون في حد

ملازمني ،حاسة بأنفاسه ،بالذات وأنا لوحدي

،بقيت عصبية مش طايقة حد ،كل ده كوم والكوابيس اللي كنت بشوفها

في منامي دي كوم تاني كوابيس بشعة حيوانات بتجري ورايا ولادي أشوفهم في خطر وأكتر

كابوس كان بيتكرر

أني كنت بشوف نفسي في المقابر أما الشيخ منصور فكنت بشوفه في كل الكوابيس كأنه

بيطاردني .

في فترة قصيرة أعصابي اتدمرت ،خسيت النص ،كبرت زي ما يكون بقي عندي 60 سنة

أنا تقريبا ما كنتش بنام من اللي كنت بشوفه كنت بخاف أغمض عيني ،أروح في النوم

،أشوف كابوس تاني .

أختي لما شافتني بالوضع ده قعدت تزن عليا علشان نروح للشيخ تاني

،قلتلها كل حاجة وأكدت عليها ماتقولش لحد لأن جوزي لو عرف اللي حصل ده ممكن يرتكب جناية .

قالتلي : خلاص نشوف شيخ تاني .

قلتلها : لأ كفاية اللي حصل لحد كده .

قالتلي : لازم نشوف حل ما ينفعش اللي أنت عايشة فيه ده .

قلتلها : أنا هسيب كله علي ربنا سبحانه وتعالي

،كل اللي حصلي ده كان بسبب أني سبت طريق ربنا وجريت ورا الدجالين .

كما في قوله تعالى

﴿بِسْمِ اللهِ الرَّحْمنِ الرَّحِيمِ﴾

وَأَنَّهُ كَانَ رِجَالٌ مِّنَ الْإِنسِ يَعُوذُونَ بِرِجَالٍ مِّنَ الْجِنِّ فَزَادُوهُمْ رَهَقا ً

صدَقَ الله العَظِيم

الحمد لله ما عداش وقت طويل وعمي قالنا علي شيخ بيعالج بالقرأن

والمرة دي أخدت جوزي معايا والحمد لله بعد ما التزمت بالبرنامج العلاجي

اللي كان كله بالقرأن ربنا من عليا بالشفا .

﴿بِسْمِ اللهِ الرَّحْمنِ الرَّحِيمِ﴾

وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِّلْمُؤْمِنِينَ ۙ وَلَا يَزِيدُ الظَّالِمِينَ إِلَّا خَسَارًا

صدَقَ الله العَظِيم

تمت .

الجمعة، 5 أبريل 2019

زوجة رجل مسافر الجزء الرابع

بعد ما بعت لجوزي رسالة قولتله عاوزاك في موضوع مهم . ما اتصلش بيا

إلا تاني يوم

رديت عليه : السلام عليكم إزيك يا عبدالله عامل إيه ؟

قالي : الحمد لله خير بعتيلي رسالة بتقولي عاوزاني في موضوع عاوزه إيه ؟

قلتله : مش تطمن عليا أنا والولاد الأول (كنت بقول كده بمنتهي الكسرة وصعبان عليا نفسي

أوي) .

قالي : بقولك إيه أنا مش فاضي للكلام بتاعك ده خلصي عاوزة إيه ؟

قلتله : مش فاضيلي بس فاضي للأندونيسية اللي إتجوزتها ورمتني أنا وولادك ؟

قالي : إيه اللي أنت بتقوليه ده ،أنت أتجننتي ولا ايه ؟

قلتله : سارة مرات عمر(بنت خالتي) قالتلي كل حاجة أنا قصرت معاك في ايه علشان تعمل

فيا كده

ولادك دول ذنبهم ايه ،ليه تعمل فيا كده يا عبد الله وكمان تسكنها في الشقة اللي كنت عايشة

معاك فيها .

قالي : أه اتجوزت وان كان عجبك ماحدش ليه حاجة عندي عاوزه تقعدي تربي ولادك

اقعدي عاوزه تطلقي الباب يفوت جمل واعملي حسابك لو خرجتي من البيت مش هتطولي

قرش ...

وقبل ما أنطق قفل التيليفون في وشي ........

ماقدرتش أستحمل لميت حاجتي وأخدت ولادي وروحت عند والدتي .

واللي كمل عليا لما إخواتي الرجالة عرفوا اللي حصل وقالولي : كل واحد فينا فيه اللي مكفيه

ما احناش حمل مصاريفك ولا مصاريف عيالك روحي شقتك وعيشي وربي عيالك

وأمي مافيش بإيدها حيلة كان قلبها بيتقطع عليا بس هتعمل ايه ؟

بعد فترة وأنا لسه عند والدتي عرفت من بنت خالتي أن مراته خلفت بنت وطاير بيها (طيب

وولادي فين من ده كله) ايه الظلم ده قعدتي طالت عند والدتي ،الحوجة وحشة أوي

في نص الشهر كان مابيبقاش معانا ولا شلن اضطريت إبيع جزء من دهبي علشان أعرف

أأكل عيالي ،جوزي بيلوي دراعي علشان عارف ظروف أهلي !!!!!!!!!!!!!!

وبعد 6 شهور ليا أنا وولادي في بيت أهلي ،جوزي ما سألش فيا ولا في ولاده

كل اللي حواليا نصحوني أرجع بيتي وأربي ولادي وأنا بردو فكرت لما دهبي يخلص هأكل

ولادي منين ،عمر جوز بنت خالتي كلمه علشان أرجع بيتي ويرضي يبعت مصاريف لولاده

وبعد ضغط من عمر جوزي وافق يبعت مصاريف للعيال .

وفعلا رجعت شقتي علشان المصاريف قلت لنفسي حتي لو قليلة أحسن من مافيش المهم

أعرف أصرف علي ولادي ،في البداية كنت حاسة أني عايشة أصعب أيام حياتي

في قهر وذل وكسرت نفس بس بعد فترة ولادي بدأوا يكبروا وهما حنينين عليا وبارين بيا

،شوفت فيهم سعادتي وشبابي والحمد لله ربنا عوض عليا بيهم دلوقتي لو رجع بيا الزمن

عمري ما كنت هضيع ثانية من عمري وأنا زعلانة وحاسة بالكسرة من حد باعني ورماني

أنا وولادي .

هو بالنسبة ليا أنا وولاده دلوقتي مصدر للفلوس فقط لا غير

يعني هو اللي لازم يحس بالذل والكسرة هو وأي راجل زيه يفكر يرمي

مراته وأولاده....

تمت .

حكايتي مع الدجال الجزء الثاني

روحت أنا وأختي للشيخ منصور في بلد جنبنا

لما وصلنا عنده البيت أخته فتحت لنا أوضة ودخلتنا قعدنا خمس دقايق

ولاقيناه داخل علينا قال : أهلا وسهلا ،مين اللي تعبان ؟.

قلتله : أنا .

قالي : ألف سلامة ،سألني عن إسمي وإسم أمي ،كتبهم في ورقة

وسألني : إيه مشكلتلك ؟ إحكي لي كل حاجة !

قلتله : من فترة بدأت أحلم بكوابيس قاطعني وقالي : بتشوفي تعابين أو كلاب .

قلتله : أيوه وقطط وحيوانات تانية بتجري ورايا .

سألني : في مشاكل ولا حاجة بينك وبين جوزك ؟

قلتله : طول ما جوزي بيبقي موجود في البيت بحس بخنقة مش طبيعية وببقي مش طايقاه

،هو أنا كده ممكن حد يكون عاملي حاجة ؟

قال : علي الأغلب أيوه ،عدوا عليا بعد أسبوع علشان أكون اتأكدت .

ومشيت أنا وأختي وكل واحدة روحت بيتها .

وكان عندي أمل أن الشفا ييجي علي ايده بالذات أن طول الطريق وأختي

كانت بتحكي لي قد إيه بنت عم جوزها كانت تعبانة وازاي من تالت زيارة للشيخ منصور بأت

زي الفل

ومش دي لوحدها اللي خفت علي ايد الشخ منصور ده في غيرها وغيرها .

لما روحنا للشيخ منصور بعد ما الأسبوع عدي اداني عسل وإزازة مافيش عليها أي كتابة

فيها زي دوا وقالي في فعلا حد حاطك في دماغه بس ما تقلقيش علاجك عندي إن شاء الله

وطبعا دفعت مبلغ محترم و المبلغ ده كان بيتدفع كل زيارة في الزيارات اللي بعد كده

وتقريبا بقيت أروح أنا وأختي كل أسبوعين للشيخ منصور

لحد ما في مرة بعد ماروحنا أخت الشيخ طلبت من أختي أنها تستني بره لأن الشيخ

طلب كده .

ودخلت استنيت الشيخ وبعد 3 دقايق الشيخ دخل وساب باب الأوضة مفتوح

وقالي هاا ايه الأخبار ؟

قلتله : الحمد لله اتحسنت كتير؟

قالي : كويس ،شوفي بقي الطلب اللي هطلبه منك ده لو ما اتنفذش هترجعي أسوأ من الأول !!!!

يتبع..............................

حكايتي مع الدجال الجزء الثالث .

دهشان

دهشان طفل جميل يعيش مع والديه وأخوه الصغير حسان .

كان دهشان لا يهتم بنظافة يديه بالرغم من نصائح والدته بضرورة غسل يديه قبل الأكل

وبعده حتي لا يصاب بالأمراض ولكن دهشان دائما ما كان ينشغل باللعب

وعندما كان يحين موعد الطعام كان دهشان يذهب للأكل مباشرة دون غسل يديه

و اذا سألته والدته : هل غسلت يديك يا دهشان ؟

كان يقول لوالدته : نعم يا أمي .

بعد فترة لاحظت أم دهشان أن إبنها لا يأكل كعادته وأصبح يشكو من الم في بطنه

ولا يستطيع اللعب بسبب ضعف جسمه ففكرت في أخده إلي الطبيب لكي تطمئن عليه .

وذات صباح اصطحبت الأم دهشان للكشف عليه .

وبعد أن أنهي الطبيب الكشف قام بسؤال دهشان : هل تغسل يديك قبل الأكل وبعده

يا دهشان أجبني بصدق حتي أستطيع علاج ألم بطنك .

فقال دهشان : أحيانا أكون مشغول في اللعب فأذهب للأكل مباشرة .

فقال الطبيب : إذا هذا هو سبب ألمك يا دهشان لقد نقلت يديك الملوثة المكروبات مع الأكل إلي

معدتك .

سأعطيك بعض الأدوية التي ستعالج معدتك ولكن اذا أهملت غسل يديك سيعود الألم مرة

أخري وسيكون من الصعب علاجه لأن المكروبات ستكون أقوي .

وعد دهشان الطبيب أنه لن يهمل غسل يديه مرة أخري .

وبعد أن أكمل دهشان العلاج إختفي الألم وأصبح بصحة جيدة

وأخذ وعد علي نفسه أنه لن يهمل غسل يديه أبدا ليحافظ علي صحته

ولا يعرض نفسه للمرض .

الخميس، 4 أبريل 2019

حكايتي مع الدجال الجزء الأول

أنا عايشة في قرية الجهل متفشي فيها و تفشي الجهل ده بيكون مصيبة فمابالك

لو كان الجهل ده مقترن بقلة الوازع الديني وللأسف ده حال قريتي مش

هقول أن القرية كلها بالشكل ده لكن الغالبية العظمي بالطريقة دي

لدرجة أن لو حد شايل منك بسبب مشكلة بسيطة أو حتي مافيش بينك وبينه

خلاف أو مشاكل بس مضايق منك ،ده أنت ساعات مابيكونش بينك وبينه معاملة

أصلا و يدفع فلوس علشان يدمرلك حياتك

وللأسف أنا كنت من ضمن الضحايا.

أنا سامية عندي 35 سنة ربنا رازقني بنتين وولد ،جوزي الحمد لله إنسان مقتدر

ماديا كنا عايشين حياة عادية زي أي حد عايش في قرية .

لكن من 7 سنين بدأت أحلم كل فترة بكوابيس (قطط ،كلاب ،تعابين وحيوانات

مفترسة) وجوزي لما كان بيبقي موجود في البيت كنت بحس بضيق وخنقة .

لما حكيت لأمي وأختي قالولي : لازم نروح لشيخ تلاقي حد عاملك حاجة .

قلتلهم : أنا عمري ما عاديت حد .

أمي قالتلي : يا بنتي نروح نطمن .

أما أختي قالت : تلاقيها سلفتك من زمان مابتحبكيش وباين عليها مؤذية ،بنت عم

جوزي كانت بتروح لشيخ وخفت علي إيده هروحلها وأجيب منها العنوان ونبقي

نروحله .

قلتلها : اوعي تقوليلها أن أنا اللي عاوزاه أنا مش عاوزة حد يعرف عن

الموضوع ده حاجة وكمان لازم أخد رأي جوزي الأول في المشوار ده .

قالتلي ما تخافيش مش هقولها حتي لو سألتني لمين أنا هتصرف ربنا بس يجعله

بالشفا .

ما عداش الأسبوع وكنا رايحيين للشيخ ومن اليوم بدأت معاناتي الحقيقية .

يتبع ...............

حكايتي مع الدجال الجزء الثاني .

زوجة رجل مسافر الجزء الثالث

لما بنت خالتي قالتلي أن جوزي متجوز

قولتلها : متجوز .... إزاي إذا كان هو بقاله فوق السنتين منزلش مصر

علشان ظروف شغله ملطشة معاه

أكيد يعني لو كان نزل إتجوز كنا هنعرف أنو في مصر .

قالتلي : ومين قالك أنو علشان يتجوز كان لازم ينزل مصر ؟ جوزك

إتجوز واحدة اندونيسية

عرفها عن طريق شغله من قبل انت حتي ماتنزلي مصر علشان تولدي

محمد .

ولما انت نزلتي إتجوزها وسكنها معاه في نفس الشقة اللي كنتي عايشة معاه

فيها .

قولتها : لأ اكيد الكلام ده مش حقيقي أكيد حد ما بيحبوش هو اللي مطلع

عليه الكلام ده مش معقول .

قالتلي : عمر جوزي عارف من أول ما عبدالله عرف البنت دي ومارضيش

يقولي علشان كان مفكرها نزوة وهتروح لحالها

بس لما عرف أنها حامل قالي وقالي لازم أعرفك علشان تشوفي هتعملي

ايه ؟ ده حتي عمر جوزي بيقولي

أنو صارف اللي وراه واللي قدامه عليها ....

(سكت مش عارفة أقول ايه من الصدمة .......)

لاقيتها بتقولي : هتعملي ايه ؟

قولتلها : مش عارفة اللي عاوزه ربنا هو اللي هيكون هسيبك دلوقتي .

قفلت معاها وفتحت في العياط ،عيط .

عيط علي عمري وأحلي أيام حياتي اللي بيضيعوا مني وأنا مستنياه وهو

راميني

وعايش حياته مع واحدة تانية يااااااااااااااااااه ده حتي الكلمة الحلوة كنت

بشحتها منه وياريته كان بيرضي يقولها لي .

عيالي اللي عيشالهم أم وأب و هو مابيسألش عليهم ولا حتي فكر ينزل

يشوف ضناه اللي من ساعة ما اتولد ماشافوش ده كمان مصاريفهم

كان بيستخسريبعتهالهم ويروح كده بكل سهولة يصرفها علي واحدة .

مع أن تصرفاته وجفائه في تعامله معايا أنا وولاده كانوا بيأكدولي الكلام ده

بس كان عندي أمل أن كل ده

يكون مش حقيقي .

بعتله رسالة وقلتله فيها . لما تفضي اتصل عليا عاوزاك في موضوع مهم .

وطبعا ما اتصلش عليا كالعادة إلا تاني يوم .

قولتله : ........................

يتبع .........................

زوجة رجل مسافر الجزء الرابع .

الثلاثاء، 2 أبريل 2019

زوجة رجل مسافر الجزء الثاني

ونزلت مصر وكان لسه فاضل علي ولادتي خمس شهور .

مابين تعبي في الحمل و تعب كريم علشان تغيير الجو قضينا الخمس شهور دول

لحد ما ولدت وجه محمد ابني للدنيا وبدأت أشم نفسي .

بس لاقيت أن خلال فترة تعبي دي أو من ساعة نزولي مصر علاقتي بجوزي

اتأثرت وبعدت المسافة بيني وبينه .

فقلت مابدهاش بقي لازم أكلمه في موضوع السفر علشان نرجع نتجمع مع بعض تاني .

وفعلا لما اتصل بيا قلتله : ايه يا عبدالله ماوحشتكش أنا والعيال ولا ايه مش عاوز تشوف محمد ؟

قالي : لأ ازاي عاوز أشوفكم طبعا .

قلنله : خلاص احجز لنا .

قالي : لأ مش دلوقتي أنا كده كده شوية وهنزل لكم .

قلتله : بس أنا والولاد عاوزين نكون معاك علي طول مش علي قد أجازة شهر ولا

اتنين تقعدهم معانا في السنة .

قالي : مش هينفع تيجوا دلوقتي أنا عاوز أعمل قرشين للعيال وأأمن مستقبلهم

مش هنفضل طول عمرنا في الغربة يا هناء .

قلتله : بس يا عبد الله دلوقتي لو أنت خدتنا مصاريفنا مش هتبقي كتير هو

علي قد الأكل و الشرب والإيجار لسه مافيش دروس ولا مدارس لما الولاد يكبروا أبقي أستقر معاهم في مصر . شوية

قالي : خلاص يا هناء قفلي علي الموضوع ده .

وفضلت أنا في مصر و هو في الغربة وحاولت أقرب منه

أرن عليه وأبعتله رسايل بحبك ووحشتني .

بس عبدالله كان بيقابل كل محاولاتي أني أقرب منه بجفاء مش طبيعي

لدرجة أني لما كنت بطلب منه يقولي كلمة حلوة ماكنش بيرضي

ويقولي مش وقته زي ما يكون بيتهرب مني .

والبخل ما إقتصرش بس علي بخل المشاعر لأ ده كمان وصل للمادة

وبقي يقلل في الفلوس اللي بيبعتها وأقوله الولاد مصاريفها بتزيد ومحتاجة فلوس

كان يقولي بس مشي نفسك دلوقتي ولما كنت أطلب منه ينزل أجازة يقولي مش هعرف علشان الشغل .

وعدي سنتين بالوضع ده كنت حاسة فيهم أني متجوزة مع إيقاف التنفيذ .

وفي يوم بنت خالتي اللي جوزها مسافر نفس البلد مع جوزي

اتصلت بيا وقلتلي أن جوزها قالها أن عبدالله جوزي متجوز ومراته حامل .

يتبع .............................................

زوجة رجل مسافر الجزء الثالث .

زوجة رجل مسافر الجزء الأول

بعد وفاة والدي عشت أنا ووالدتي حياة بسيطة بمعاش والدي اللي كان يادوب

بيكفينا مع ان ليا أخين أكبر مني متجوزين وعايشين معانا

في نفس البيت بس كل واحد منهم كان مشغول ببيته وحياته .

بعد ما كملت 21 سنة إتقدملي عبدالله شاب لسه في بداية حياته .

شغال في شركة بمرتب كويس و تمت الخطوبة .

و بعد الخطوبة ب 3 شهور لاقيت عبدالله بيتصل بيا

وبيقولي : وشك حلو عليا يا هناء .

قالتله : يا رب دايما يا عبدالله خير في إيه ؟

قالي : جالي سفر لبلد عربي بعقد كويس وإن شاء الله لما نتجوز هاخدك معايا .

وزي أي بنت في سني وظروفي الصعبة فرحت أوي وقلت لنفسي :

سفر يعني راحة وفلوس وعيشة مرتاحة (ما كنتش أعرف أن السفر ده هيتسبب بعد

كدة في أكبر مشكلة في حياتي) .

وفعلا بعد شهر ونص سافر وكان كريم أوي معايا

كل فترة كان بيبعتلي مبلغ كان بيساعدني في الجهاز .

وبعد سنة نزل عبدالله مصر وإتجوزنا وقعد معايا شهرين أجازة الجواز

وسافر تاني وبعد ما سافر ب 3 شهور عملي ورق وسافرت له .

بعد ما سافرت بفترة بسيطة حملت ولما قربت الولادة نزلت مصر علشان الولادة .

بعد ما ولدت كريم ابني بفترة قصيرة سافرت تاني لجوزي .

ولتاني مرة حصل حمل وطبعا كانت فترة صعبة عليا لأن كريم كان لسه صغير وأنا كنت

تعبانة في أول الحمل .

وبدأ عبدالله يبقي شارد طول الوقت وأحواله متغيرة بس قلت يمكن هرمونات الحمل

مأثرة عليا .

لكن وأنا في نص فترة الحمل لاقيت عبدالله بيقولي : جهزي نفسك علشان

أنا حجزتلك أنت وكريم علشان هتنزلوا مصر.

قولتله : بس لسه شوية علي ولادتي .

قالي : أنا شايفك تعبانة في الحمل وكمان كريم حمله تقيل عليكي و أنت لوحدك

وأنا طول اليوم بكون في الشغل إنما لو نزلتي مصر هتلاقي اللي هيكون معاكي

ويشيل عنك وبعد ماتقومي بالسلامة هتيجي تاني أنت والولاد .

ونزلت مصر أنا وابني مع اني ماكنتش مستريحة للحجز المفاجئ ده .

ويارتني مانزلت لأني من الوقت ده بدأت أعيش أتعس أيام حياتي .

يتبع ......................

زوجة رجل مسافر الجزء الثاني .

قصص

المتابعون

الأقسام